Khawaateen ki jadeed taaleem
Sharique Ali
SAP BTP Full-Stack| CAPM| Integration Suite| API Management|SAPUI5|FIORI|Cloud Native HANA| ODATA| Workflow BPA | NodeJS|Custom UI for MyInbox BPA
Jadeed taaleem ne aurton se adawat ki hai. Ye maashre mein azaab ki tashkeel hai jo aurton pe maazi mein kiye gaye mazaalim Ka sabab ban ke chaaya hai.Aurton ke nazariye ka tahaffuz kisi tahzeeb ya tamaddun se kam nahi hai. Iska taareekhi pasmanzar ka agar jaaiza len toh hume pata chalta hai ki maghribi tehzeeb ke aghaaz mein aurtein aksar mardon ki tashaddut Ka shikaar rahee hain.Isliye aurton ke aazaadi(women emancipation) ke naam pe jo tsunami barpaa kiya gaya hai uski shuruaat waheen se huee hai aur mashriqee khawateen ko gherne ke liye Beijing conference aur Qaahera conference muntakhab kiya gaya tha.Maine izhaare khayal ke liye zabaan-e urdu ka intekhaab isliye kiya hai ke isko padhne waale sirf aur sirf ahle nazar hon.Aur platform linkedin ko isliye banaya hai kyunki jadeed taaleem mein se urdu waale bahut kam milte hain.
Tareekh shaahid hai ki Huzoor ki aamad ne ek daaire ke bheetar aurton ko bharpoor aazaadi faraham ki.Maghribi tehzeeb ne iske nateeje mein mosaawaat ke naam pe, haalaat ke sitam mein jakdi aurton ko bepanaah aazaadi de di.Nateeja ahle nazar ke saamne hai.Aurat pe zulm toh beshak ruk gaye kyunki wokhud zulm Ka mazhar banti gayee.Aaj maghrib mein qudrati taur pe kamzor hone ke baawajood ye sabse qawi hain.Guzrashta kuch saal qabl kisi maghribi mumaalik ke ek sadar ne apne ek bayaan mei shaadi ki ahmiyat ko bataate hue logon se shaadiyan karne ki mohazzibaana darkhwast ki aur saath mein ye bhi khabardaar kiye ke agar ye na hua toh bahut jald humaari awaam haraamzaadon pe mushtamil hogee.
Shaadi qudrat ka ek haseen tohfa hai jo aurat aur mard ke jinsee taqaaze ko jaaez tareeqe se takmeel kartee hai.Aulaad ka wajood mein aana mulk-o millat ki buniyaad hai.Aulaad se khaandaa,khaandaan se maashra, maashre se mulk wajood mein aata hai.Isliye shaadi ek apnaapan aur ittehaad ki nauuiyat rakhtee hai.Maghrib mein ye silsila apne khaatme pe hai, aur musaawaat ke nateeje mein logon ne shaadi jaisee paak cheez se perhez kar liya hai, kyunki shaadi aurton ko mazloom samajh ke unke huqooq ke tahffuz ke liye unhen ghair zaroori aazaadi faraham kar deti hai.Maslan agar mard apnee beewi ke saath humbistari ke liye agar baar baar israar kare to use maghrib mein marrital rape kaha jaata hai. Isee tareeqe se deeegar masaail hain shaadi ko lekar jisse khaas taur se mardon ne parhez kiya hai. Apne jinse taqaazon ko poora karne ke liye afraad ki azadi ke naam pe livin-relationship qayam ho rahe hain jo ek mohazzab maashre ki nasl kushee kar raha hai.Ye phailtee huee aag se mashriq bhi ab mehfooz nahin hai.
Jinsee taqaaze insaan ki buniyaadi zaroorat hain aur inka jaldi na poora karna ek bade gunaah ki nauyiat hai jo rafta rafta maashre mein ek buraai ko janm deti hai. Ab isko aap taaleem haasil karne ke naam pe taakheer karen ya ye ki abhi bachhee hai, ya sanjeeda nahin hai, khwaah koi bhi bahaane ho, wo zaroootat apne payetakmeel tak pahunchne ke liye aapko kisi aur tareeqe se majboor karegi.
Lehaaza ye motabaaraana guzaarish hai ki shaadi ki ahmiyat aur uskee azmat ko nazarandaaz na karen.